تحليل بالمنطق

احنا اصبحنا امام خيارين مرسي او شفيق؟

تعالوا نقرأ المشهد للأخر لو كان لسان حالنا ان الأتنين لا يصلحوا ونحاول نختار الطالح اللي ممكن نقومه او نسقطه

تعالوا نشوف بالمنطق وصول كلا منهم للرياسة وإفتراض أسوء الفروض ان الأتنين طلعوا ولاد تيت وثورنا ضدهم

احنا عندنا سبع حاجات ( البرلمان- الداخلية – الجيش – الأعلام – اللجنة التأسيسية للدستور - الوزارة – مؤسسة الرياسة) هم دول اللي بيمثلوا السلطة في مصر

هنناقش كل مرشح بفرضين البرلمان ممكن يتحل او ما يتحلش

في حالة إنتخاب مرسي لو البرلمان ما اتحلش :-

-         البرلمان شعب وشوري أغلبية أخوانية.

-         الداخلية ما سمعناش قبل كده عن لواء شرطة أخوانجي كانوا شالوه من زمان وطلعوه حرامي

-         الجيش نفس قصة الداخلية مفيش لواء ينتمي لجماعة او تيار ديني طبعا  

-         الأعلام مجلس الشوري اخواني وممكن يعين قيادات أخوانية وبكده يبقي الأعلام أخواني

-         اللجنة التأسيسية للدستور ممكن تحد من صلاحيات الرئيس وتخلي الدولة برلمانية وبكده يبقي حزب الأغلبية بمجلس الشعب هو اللي بيشكل الحكومة ومجلس الشعب هوه المنوط بحلها يعني الحكومة هتكون إخوانية سواء بالبرلمان او عن طريق الرئيس

-         مؤسسة الرياسة لو نجح مرسي إن شاء الله يبقي الرئيس إخواني ويبقي معاه ( إعلام وبرلمان ووزارة ورياسة) يعني الإخوان هيكون كوشوا علي أربعة حاجات مش منهم الجيش ولا الداخلية يعني لو مرسي طلع فاسد بمجرد خروج الشعب لميدان التحرير يستطيع أن يسقط النظام في أقل من 18 ساعة لأن اللي بيحمي النظام القوة والقوة في إيد الجيش والداخلية والمفروض يعني ان الجيش والشرطة والشعب إيد واحدة يعني القوة معانا مش مع الإخوان

في حالة إنتخاب مرسي لو البرلمان اتحل :-

-         البرلمان احنا اللي هننتخبهم واحنا اللي هنجيب اللي احنا عايزينهم يعني بإيدينا نجيب تيار معارض للأخوان وطبعا ما يقدروش يزورا لأن الجيش والشرطة هما اللي بإيديهم يحموا الإنتخابات ويخلوه نزيه وهما مش مع الإخوان

-         الداخلية نفس حالها عمرها ما كانت من  الأخوان

-         الجيس نفس حاله مش أخوانجية

-         الأعلام مجلس الشوري الجديد اللي هننتخبه يبقي قيادات إعلامية محايدة يعني مش أخوانية

-         اللجنة  التأسيسة للدستور هتتشكل من جديد ومجلس الشعب الجديد اللي أنتخبناه هو اللي هيحدد وساعاتها ممكن يجعل الدولة برلمانية يعني حزب الأغلبية يشكل الحكومة وبكده نضمن إن الحكومة معانا مش مع مرسي او الأخوان 

-         لو نجح مرسي يبقي يمتلك الأخوان مؤسسة الرياسة بنفي الفكرة السابقة يبقي الإخوان ما عندهومش حاجة غير الرياسة بس وبكده لو مرسي طلع فاسد يبقي بمجرد خروج الشعب للميادين يسقط مرسي والأخوان في أقل من 6 ساعات علي رأي الراحل السادات.

في حالة إنتخاب شفيق لو البرلمان ما اتحلش وده طبعا في المشمش:-

-         البرلمان شعب وشوري أغلبية أخوانية.

-         الداخلية مع شفيق الراجل الوحيد اللي هيحقق الأمن في 24 ساعة يعني ضامن ولائهم

-         الجيش نفس قصة الداخلية أصحابه وعشرة عمر

-         الأعلام مجلس الشوري اخواني وممكن يعين قيادات أخوانية وبكده يبقي الأعلام أخواني

-         اللجنة التأسيسية للدستور هي السبب المنطقي اللي هيخلي شفيق يحل البرلمان انهم ممكن يخلوا الدولة برلمانية ويحدوا من صلاحيات الرئيس والراجل أعلن قبل كده انه مش موافق وهيستقيل وده طبعا كلام نصفه صدق ونصفه كذب لأنه فعلا مش هيقبل بس مش هيستقيل هو هيقيل مجلس الشعب وده السبب اللي خلي فكرة انه ما يحلش البرلمان مستحيلة  

-         الحكومة علي إفتراض ان شفيق ما حلش البرلمان وسابهم يخلوا الدولة برلمانية ويشكلوا الحكومة هتبقي حكومة إخوانية

-         يعني شفيق لو نجح هيكون معاه الرياسة والداخلية والجيش وطبعا كلنا عارفين انه فاسد فلو صحيت ضمايرنا او جيه شباب غير اللي ماتوا وطالبوا بإسقاطه هيقوم مموتهم زي اللي فاتوا بالجيش والداخلية لأنه يمتلك القوة وما تقولوش ما يقدرش لأنه حسني مبارك ما عملش كده لأن وجوده غير شرعي  لكن الوضع اصبح مختلف شفيق هيبقي نجح بإنتخابات نزيهة بشهادة العالم وساعتها يبقي حقه يحاكمهم بتهمة قلب نظام الحكم والراجل قال بالنص اللي هيولع في ميدان التحرير يطفي هو والميدان بالقانون القانون بيجرم كده يعني قاعد قاعد مش ماشي وراحت الثورة وراحت فلوسنا وراح دم الشهداء

طب لو إنتخبنا شفيق والبرلمان اتحل:-

-         البرلمان احنا اللي هننتخبهم والمفروض ان احنا اللي هنجيب اللي احنا عايزينه بس الجيش والشرطة هما اللي بإيديهم يحموا الإنتخابات ويخلوه نزيه وهما مش معانا هما مع شفيق صاحبهم وعشرة عمرهم يبقي هيجيبوا اللي يقول عليه

-         الداخلية رجالته هيرجعلوا الأمن في 24 ساعة اللي ما عملهاش 3 وزراء داخلية في سنة ونصف

-         الجيش أصحابه ياناس

-         الأعلام هيجيب سيد علي وهناء السمري

-         اللجنة  التأسيسة للدستور هتتشكل من جديد ومجلس الشعب الجديد اللي ما  أنتخبناهوش هو اللي هيحدد

-         الحكومة سواء الدولة بقت برلمانية او رئاسية طبعا هيكون رئيس حكومة من دولة الفساد

-         يعني شفيق لو نجح هيكون معاه الإعلام والرياسة والبرلمان والحكومة والجيش والشرطة يعني حسني مبارك رجع تاني بس المرة ديه بشرعية وإنتخابات نزيهة شهد عليها العالم يعني ساعتها هيغيروا محطة المترو بدل ما بقت الشهداء هيسموا الأقلية الخونة  

ارجوكم هذه المرة لا تختاروا الإستقرار لأن الثورة قامت اصلا من أجل الإستقرار بعدها اختار الشعب نعم عشان الإستقرار وما جاش إستقرار ولا حاجة وده كله كان مخططله بأزمات متتالية وكوراث تشغل مجلس الشعب عشان ما يشكلوش لجنة المائة ويعملوا الدستور قبل ما يجي رئيس تبعهم ويحللوا مجلس الشعب ويعملوا دستور علي مزاجهم ونرجع إلي ما قبل 25 يناير

اللهم ولي علينا خيارنا وأجعل كيدهم في نحرهم